استار العياب

ياهل القناة اللي تلمون البنات مع الشباب=تبيتون الذيب وام قرين في نفس المراح

تمارسون اكبر جريمه ياعساكم للذهاب=اكبر دليل ان المحرم في شريعتكم مباح

أستار اكاديمي وانا سميته استار العياب=الا ملم الشين وشعار الردى والانفتاح

يحارب الاداب والعفه ويفتح كل باب=لهل العقول اللي مصابه بالتخلف والكساح

اليا تلاقوا فيه والستر انكشف والعقل غاب=افلس من الحشمه وبرق المعصيه رفرف ولاح

والمشكله لن صار بالدعوى تشقلب وانقلاب=والطايح اصبح فوق واللي فوق ماحوبه وطاح

يبي يطول الليل حط وشيل مافيه انسحاب=وكلٍ يردد لوسمحت شوي ريّض ياصباح

ليت المدرب شجع قروبه على كتب الكتاب=ونادى لهم ماذون عله يبرم عقود النكاح

مير المصيبه قايد الجربان بالحكه مصاب=ومن الجهاله والمعاصي غادي(ن) عقله براح

يومي براسه جعل راسه عند منقوش النصاب=وفي منهجه كلٍ على ماقيل مطلوق السراح

رقص وتمارينٍ غريبه صابني منها رعاب=يارب ثبتني وساعدني على كبح الجماح

على الهواء بثياب مشبوهه ومر بلاثياب=وكلٍ على مايشتهي ويحب والدعوى سماح

هذي حقيقه ماعليها لاغبار ولاضباب=والقصد منها صرفنا عن مافي الامه من جراح

وحنا ياماشالله على السنه وماجا في الكتاب=السيل يمشي من تحتنا ونتشدق بالصلاح

بيوتنا فيها القناه ام الخلاعه والخراب=وعيالنا على متابع بثها جاهم شفاح

يالغافل انت بدون قصد ادخلت في منزلك داب=دابٍ خطير وراس نابه ينقل السم الذحاح

جبته وقربته وطاب الوضع لعيالك وطاب=لهل الرذيله بعد ماحالف مخططهم نجاح

اهداف الاعدا انا نكون اهون وادق من التراب=ياكرمهم باللي يضيعنا وبالنافع شحاح

غزوا شباب المسلمين بلاسيوف ولاحراب=حتى صغار السن صار لفكرهم شبه اجتياح

ننام وعقول الصغار انظف من رشاش السحاب=والصبح نلقاها بفكر الغرب وسمومه لقاح

عندي سؤال وكل من يسأل يدوّر للجواب=الى متى تومي بنا في دربها انسام الرياح

ان كان مانصحى ونحسب للعدو مية حساب=ضعنا ورحنا مثل حيٍ قبلنا والا وراحdoPoem(“font=’Simplified Arabic,6,#FFFFCC,normal,normal’ bkcolor=’#FFFFFF’ bkimage=’images/backgrounds/3.gif’ border=’solid,1,#006600′ shadow=’1′ type=1 line=0 align=center use=ex num=’0,#400000′”);