البراري

أشربي ياعين من صافى الخباري=ارتوي منها بعد شوفك وردها

ارتوي منها ومن سحر البراري=وارحلي من فيضةٍ للي بعدها

أفرحي وافقتي اعياد الصحاري=العفيفه دوبها فلت جعدها

عقدها النوار وطلوع الثماري=وبالخزاما والنفل تستر جسدها

والخضاب من الشمطري والزهاري=وعذب ماء صافي خباريها شهدها

عيطموسٍ مالها ندٍ يماري=هي سعد روحٍ سعدها من سعدها

ماحلى لاهب نسناس الذواري=وسلمت له عطرها الفاخر بيدها

وعانق النسناس تغريد القماري=وأم سالم بالطرب غنت وحدها

وماحلى بربوعها جول الحباري=بين ريضان الحيا يطرب طردها

والقطا بمروجها جاله تباري=والسمانا شفت عينه من مددها

هي غرام اللي بهد الطير ضاري=جا لها من نايد البعد وقصدها

يختبر بفجوجها فرخ الحراري=بعد علّم هدته هذا وعدها

عن مراده ماتغيره الطواري=ولايحل عقود عزمه لاعقدها

تبعده عن سوق بياعٍ وشاري=وعن تكاليف الحياة وعن نكدها

وان غشاه الليل مادوّر مذاري=عزبته جزله ولانقّص عددها

شب له نارٍ تنادي كل ساري=ماحجبها مستعد لمن عمدها

وقرّب دلالٍ صفر فيهن مواري=من كثر ماصالت النار وكبدها

واحتزم للكيف بيطارٍ قراري=لجل حشمتها حريصٍ من نقدها

وحشمة اللي مايضيمون المباري=الخوي لامن طلب حاجه وجدها

غاليات طبوعهم ماهي عواري=فزعة اللي طاول عيونه سهدها

هرجهم صحيح مسلم والبخاري=وشكر للي ثبّت الارض ومهدها

وابتدا مزحٍ من التجريح عاري=والقصايد خيّلت وارعد رعدها

الحكم فيها مثل ضرب السواري=من حلاها لاختمها قيل عدها

كنها نورٍ يشعشع بالغداري=بالعبارات الخليعه ماضهدها

اخوياي وغيرهم يصلح ل غاري=والعرب عن شفها ماحدٍ نشدها

سيفي ودرعي عن اسباعٍ ضواري=في ديارٍ تترك الخلفه ولدهاdoPoem(“font=’Simplified Arabic,6,#000000,normal,normal’ bkcolor=’#E0EEE1′ bkimage=” border=’ridge,7,#1F8707′ shadow=’1′ type=0 line=0 align=center use=ex num=’0,#400000′”);