الزمن

يقولون السعاده ماتدوم وللزمن ميلات=واقول الناس مدري عن عذابي ويش دراها

اكيد ان الجروح اللي تمركز بالجسد والذات=تجلّت بالعيون وقامت العذال تقراها

الا ليت الفراق ذنوب واسأل غافر الزلات=يفرّج عن عيونٍ نومها مر وتعداها

تعد اللي بقا من ليلها مافات واللي فات=وتهجا طيفك اللي بالحضور اسرف وعناها

حبيبي لاتخليني مجال لنظرة الشمات=ترى نصف المقابر يالعنادي من ضحاياها

تعرف اني بشر ماني بمعصومٍ من العثرات=وقعت بغلطة اللي جا يكحل عينه اعماها

وسجنت الهم في صدري وفاض وضعفت الحيلات=وشالت غرفتي واليوم ضاقت به زواياها

وجيتك في ضميري عبرتٍ ماهي كما العبرات=يكتفها الندم وتزف لك دفتر خطاياها

عساك اليا عرفت الحال تنسى كل شيءٍ فات=ولاتنسى العهد وترجع العشره لمجراها

على نار انتظارك واحسب الايام والساعات=عسى سود الليال تبدل الظلما بقمراها

لكن اخاف جود الرايحات اكثر من الجايات=سنين العمر كم شفت الخيانه في مراياها

صحيح ان السعاده ماتدوم وللزمن لوعات=وانا احسنت الظنون ودنيتي ماعرف نواياها

وانا اللي عشت عمر البعد عن شوفك صبر وسكات=امني النفس في ساعة سماحك واتحراها
doPoem(“font=’Simplified Arabic,5,#FFFFCC,normal,normal’ bkcolor=’#FFFFFF’ bkimage=’images/backgrounds/3.gif’ border=’solid,1,#006600′ shadow=’1′ type=1 line=0 align=center use=ex num=’0,#400000′”);