الوضح

لاحت بروق الربيع وهلت مزونه=وقام يتخطّف نظر عيني تلامعها

وردوا لي العلم عنه اللي يعسونه=قالوا لي الدار زاينت مرابعها

تستاهله ندرٍ فى الشبك مسجونه=وضحٍ رسوم الغلا والزين تجمعها

من شول قرمٍ هل الحاجات ينصونه=ماتاخذ من الجوايز غير فارعها

عفرٍ تحارش وبرها ناصعٍ لونه=بالشاش الابيض تقول انك مقوبعها

فيها لقيت الجمال اللي يقولونه=وكل الوصوف الحسينات بتنوعها

الراس جعل المقرّد مايشوفونه=والخد راهي وفاهقتٍ مسامعها

والخشم وافي من رثمته لعرنونه=وضافي سبالٍ تقول تويق لاربعها

والغارب اسند ونسنوسٍ يعدونه=وارقابها جرد والرحمن رافعها

اما النحر باب من ربعه يحبونه=مكبره والدرف دايم مشرعها

وذرعانها برعه جلاله وموزونه=وكتفٍ وعضدٍ وكوعٍ منسجم معها

والجنب سفينةٍ بالثلج مدفونه=ربانها ضيع الوجهه وضيعها

وحذف بها الموج ساعة جنت جنونه=على عدامه وجا الثلج وتقنعها

والورك وثن وسنامٍ فاهقٍ دونه=والعيز مالون واذيالٍ تجابعها

اياتٍ ابدع بها اللي مبدعٍ كونه=ماينحصر وصفها سبحان صانعها

ان عرّضت مثل مزنٍ هزع ردونه=وان ناحرت سند وان قفت تهيزعها

ترعى مربٍ هل البل ماينوشونه=مثل الخيام المبناه بمراتعها

ماكنها غير بالمقهور مقرونه=وصوت الموده ليا وده يزعزعها

وان كان طق اللبيد وكوسر لحونه=وبطح لها تلحق اتلاها طلايعها

من السطر روسها بالهوش مشحونه=لوقدمها قوة امريكا تدرعها

ارواحها بالطرب والغي مسكونه=وراع الطرب والولع روحه تمتعها

أدناهن اللي فؤادك تبعد حزونه=لاشفتها جملة همومك تودعها

تشدي غنوجٍ عيونيه ومزيونه=من يوم هي ورعه ابوها مدلعها

قامت تثني على دفٍ يدفونه=ومن الثقه للبنات تطق بصبعها

تجيد رقص الدلال بكامل فنونه=وجديلها كل ماومت به يتوعها

بالزين تفتن وهي فتنه ومفتونه=تبرّد كبود وكبودٍ تولعها

اتطمع المهتوي وتخيب ظنونه=ويروح والنفس مانالت مطامعها

الوضح منها خذت وصفٍ تحبونه=وتفرق بباقى الوصوف وفي طبايعها

ياهل الاشاوير قلبي لاتغثونه=الوضح وقفتها ماني ببايعها

لالزموا الناس غالي مايفكون=لكن بعض العرب خبله روابعها

معهن ابا اسج والارواح مرهونه=والديره ارتاح من ضجة شوارعهاdoPoem(“font=’Arial,6,#000000,bold,normal’ bkcolor=’#FFFFFF’ bkimage=’images/backgrounds/18.gif’ border=’inset,6,#00FFAE’ shadow=’1′ type=2 line=0 align=center use=ex num=’0,#400000′”);