خطووووة الذنب

مرت بعد عام من حفلة خطوبتها= تـصـّنع الكبر والنظرات تـوحي لي

عن حزنها عن شقاها عن تعاستها=عن ليلها اللي مصابيحه مراسيلي

عن خطوة الذنب عن هجرة سعادتها=عن عطرها اللي تغّرب عن شذا هيلي

من نظرةٍ خاطفه وصلت رسالتها=وابعد نهاري بنوره وابتدا ليلي

ليلٍ سريته على ذكرى محبتها=الراحـله لهفتي والشـوق قنديلي

انفض غبار الزمن عن وجه صفحتها=واشرب فناجينها واغرق مناديلي

واخاطب الذات عنيّ بعد غيبتها=واشـكيلها لوعة الفـرقا وتبكيلي

وارجع لذاتي واراضيها واسكتها=وازيـد اعوّد لها وابكي وتشكيلي

ليه الليالي كريمه في مرارتها=تسـقيني الغدر والحرمان من جيلي

مدري ولاكن ابا اغلط نفس غلطتها=واعزف على مركب الهجره مواويلي
doPoem(“font=’Simplified Arabic,6,#000000,normal,normal’ bkcolor=’#F5E3F9′ bkimage=” border=’groove,10,#FF0036′ shadow=’1′ type=2 line=0 align=center use=ex num=’0,#400000′”);