صتم الشوازن

لو كل ماخيّلت لي برق اعسه=يمديه ضاعت صيدتي في عجاجي

لكن اشد خطام شفي وامسه=واكبح جماح النفس وانهض حجاجي

واحوز عن شعب الوخامه ورسه=لو مت ضامي ماوردت الهماجي

وان شفت بالاسواق طلعه وهسه=اكف يمنايه وادّور خراجي

ماكل مايعرض على العين اجسه=انقا وعقلي بالغداري سراجي

اخاف من شيءٍ ضميري يحسه=وانا غني عن مايعكر مزاجي

والهم عن نقالة الحكي ادسه=زينت له بين المحاني ملاجي

وان زاد بالسجات اغيب مرسه=تفرج الكربه وساع الفجاجي

واليا طرا اللي ينعش الروح حسه=اللي غرامه بين الاضلاع لاجي

سريت مع ليلٍ نسيمه ينسه=اصيح له باسمه لحالي واناجي

كن الحشا صتم( الشوازن) يبسه=والكبد لاغفها شضية زجاجي

اهرف هريف الذيب بارضٍ مرسه=واهيف مثل اللي طناها الخلاجي

وقلبٍ مراسيل الليالي ترسه=والله ليبطي مالقاله علاجيdoPoem(“font=’MS Dialog,6,#0D0D05,normal,normal’ bkcolor=” bkimage=’images/backgrounds/49.gif’ border=’double,5,#CC9999′ shadow=’1′ type=1 line=0 align=center use=ex num=’0,0′”);