مساجلة مع الشاعر كديميس العصيمي

هذه القصيدة مسندها الشاعر ضاوي العصيمي على الشاعر الكبير/كديميس بن صالح العصيمي عام 1419هـ بهدف التواصل يامل قلبٍ هموم الوقت توميبه=وتفر به مثل فرة موجة الرادي

تلعب بقلبي وتقبل به وتقفي به=وتسج به بين محدارٍ ومسنادي

وقت الغرابيل جوّد بي مضاريبه=واسهر عيوني وشب النار بفوادي

ولع وفي ضامري لاحق مشاهيبه=وعانيت منه العذاب ومر الاكبادي

وش حيلتي عقب ناشتني كلاليبه=كما ينوش اللحام اصياخ حدادي

وخيّم وفي هاجسي ثبّت مناسيبه=ثم تلني من علو الضلع للوادي

وادٍ خلاوي سناوي عاويٍ ذيبه=من طاح في غبته ماعنه نشادي

واخذت لي عام أسند فيه وانحيبه=واليا نشدني فضولي قلت له عادي

اجحد صوابي مابا العذال تدريبه=من خوف يفرح عليّه كل نقادي

واليوم زاد وفؤادي زاد تعذيبه=وارسلت شكواي للي يعرف القادي

ومن يزبن اهل الوفاء يلقى مطاليبه=وفكري دليلي ولا غوي درب ميرادي

ارد لعدٍ عذياتٍ مشاريبه=عدٍ رويٍ وجمه دوم يزدادي

الله على اللي محكمتٍ لواليبه=راعيه ماسج به سرداد مردادي

لاناش ابنصه يزفنه دواليبه=يشدي لحرٍ كفخ من كف صيادي

عليه قرمٍ يودى العلم ويجيبه=يسري وياصل قبل لا الفجر ينقادي

واليا لفى الدار مايغوى معازيبه=يشوف نار العصيمي فجر وقادي

من يوم يقبل يبا يسمع تراحيبه=والنجر يصهل يجر الصوت وينادي

في بيت عزٍ مكملة مواجيبه=يلفي به اللي حداه من الزمن حادي

ولاهو بحاجه لمداحٍ يماريبه=مثل العلم والعلم واضح للاشهادي

لولا فعوله ماسمي شاعر عتيبه=يشهد بها كل عرافٍ وقصادي

له ماقفٍ كل خلق الله تدريبه=يوم(ن) جا فالعلوم علوم واعنادي

ضلع المعارف بدا فا اعلى مراقيبه=وفي ذروة المجد له مجلاس وشدادي

مزبن لمن شاف له في هالزمن ريبه=وانا زبنتك يابو سلطان بالبادي

شكواي قلبٍ كثيراتٍ هناديبه=قامت تجمّع عليه ازواج وافرادي

شباب والراس عانه بادياً شيبه=فيّه ولاشفت بان الشيب فى اندادي

سبت لطيف الحشا نقاش اكاعيبه=غروٍ بحبل الموده قصّر قيادي

حكم فؤادي وحكم الزين راضيبه=راضي بحكم الغضي مركوز الانهادي

لو جيت اوصف وليفي ويش احلي به=وصفه على كل زين الكون مزدادي

شفي وقصدي وغير الترف ماليبه=هذا هوا البال هذا غاية مرادي

ياكبر حظي لو ان الحظ ياتيبه=وان كان حضي قصر لاعاد لاعادي

ويابعد دارٍ لطيف الروح ممسيبه=وانا بعد عنه الا يامبعد بلادي

خلي ورى البرث في دمثات أشاعيبه=وانا ورى عبلة الصمان من غادي

والعلم من يم خلي من يجينيبه=مدري على العهد والا كب ميعادي

عامٍ قضى لوّعة قلبي لواهيبه=واليوم ثالث شهر في عامنا البادي

ابكي ليا ذعذع الغربي هباهيبه=ويرجف فؤادي ليامن دن رعادي

ويسري بي الهم والهاجوس واسريبه=ويصبح بي الصبح ماغيرت مقعادي

قضيتي تتعب الحاسب واساليبه=في شاشة الكمبيوتر حلها غادي

والحل من طيب الجدين محري به=حيثه لحل اصعب الصعبات معتادي

وانكان ماشفت حلٍ في مكاتيبه=آمنت باني وصلت نهاية المادي
doPoem(“font=’Simplified Arabic,5,#000000,bold,normal’ bkcolor=’#FFFFFF’ bkimage=” border=’groove,5,#400000′ shadow=’1′ type=0 line=0 align=center use=ex num=’0,#400000′”);رد الشاعر/ كديميس العصيمي بهذه القصيدةيامرحبا بالكتاب ومن لفانيبه=عداد مايشركون البن بقنادي

البن والهيل من صنعاء مجاليبه=بدلال رسلان وا لا صنع بغدادي

ضاوي بعث لي مكاتيبه وانا اجيبه=وبديت رد السلام وضاوي البادي

والبيت يرفع على العمدان تركيبه=ومبناه مايستقيم بدون الاوتادي

والرجل مايمدح قدام تجريبه=وعقب التجاريب تذكر كل الامجادي

وحجمي مع المجتمع داري بترتيبه=افصل الثوب طولي وامشي حيادي

واجاوب اللي يزورني مناديبه=ولا اخطي ولا ادمح خطا من يخطي عمادي

واعرض عن اللي قريباتٍ محاضيبه=واساير الناس دامٍ الهواء هادي

لكن لاجات بين صحيب وصحيبه=واصبح صديق امس فى الميدان ومعادي

لاطق خشم الزند ثم جاك باللي به=تلقى خصيمي يداري قدحة زنادي

واليا حذفني قضبته مع تلابيبه=حتى حدانا يذب الريع شرادي

واليا زبني صويبٍ صابه مصيبه=ماني بعن نجدة المضيوم متحادي

لاصار مبلي وماصابه بلانيبه=جمعت له حيلتي مع جملة اعتادي

وان شفت دعوى رفيقي صارت صعيبه=رديت لسيوف وارثها عن اجدادي

ربعي جمالٍ تشيل الحمل ومنيبه=ينحون عن من وراهم هجمة العادي

اما اتباع الهواء والغي ماوصيبه=لنه مثل ذبذبة موجات الارصادي

ياخذ براعيه تشريقه وتغريبه=ويمضي لياليه في هم وتجلادي

راعيه دايم مشيح بساقة ذهيبه=ولو تنشده قال مالي مشخصٍ غادي

يخفي نواياه واهل العرف تدريبه=والناس في واد والمفتون في وادي

ومدامة انك بديت اعلى مذاريبه=معاد لك عن طويل الرجم معوادي

وشيٍ يساعدك فى الموضوع وديبه=لكن ماقدم الثاني على الحادي

البيت اله باب والرجال اله هيبه=والضيف ياقف على البيبان وينادي

اما حصل له معازيبٍ تهليبه=والا لقى المعذره والعذر طرادي

والبيض ميثاقهن ماكثر عذاريبه=لو سلمن لك قرار الحب باسنادي

واكثر عذاريبهن من طولة الغيبه=والناس مابين حسادٍ ورصادي

رفيقهن دوم طفاحٍ مناجيبه=ويلبس لهن كل يوم ثيابٍ جدادي

والحب قد طوع العشاق تاديبه=سيفٍ على ارقابهم ساطي وجلادي

ومن مات منهم وليه مايداعيبه=واصبح كما المنتحر بسلاح ردادي

هذاه ماخذ على الحب وهذا عيبه=كيف العماهيج يغتالن الاولادي

والناس راعي الهواء تشذب عراقيبه=وتنشر مساويه من نادي ليا نادي

بين المشاذيب من نمه اليا غيبه=حتى تلوث مجاله بين الاجوادي

اما دهوه بحرامٍ مادخل جيبه=او قالوا انه غزا لكن مافادي

وروابع الرجل بعض احيان تدويبه=لاصار مايستنير بسيرة الهادي

اللي شرع منهجٍ للناس تمشيبه=وانذر وبشر وبين طرق الارشادي

والرجل لاجنب اهل الغي من طيبه=افضل من اللي مع التيار ينقادي

كم واحدٍ عارض التيار وغديبه=واشرف ضلاع الندامه مير ماعادي

وسوق الهوا كل مشتاقٍ يحييبه=ولاله على مدخل البيبان عدادي

يبيع به صاحب المهنه ويشريبه=ويدش سوق الهوا صنديد وربادي

وابليس في وسطهم ينفض مشاعيبه=ويفنون والسوق لاينقص ولا زادي

الرابح اللي سليمٍ من غياهيبه=ماذاق جمر الغميضه عقب الانكادي

ولامقصدي ناويٍ صده وتجنيبه=لكن كثر التبجح ماله ابعادي
doPoem(“font=’Simplified Arabic,5,#000000,bold,normal’ bkcolor=’#FFFFFF’ bkimage=” border=’ridge,6,#400000′ shadow=’1′ type=0 line=0 align=center use=ex num=’0,#400000′”);