وصف ضاوي

ياقلم فى الحال سجل وصف ضاوي=لاتزيد ولاتنقّص في كلامه

شاف شيٍ هيض القلب الشقاوي=ونعنبوا من يلحق العاشق ملامه

عاشق اللي ماتقربه المناوي=حلم صقارٍ كبيرات حلامه

نادرٍ نوعه لكل الزين حاوي=مايوصف غير برجال الزعامه

مثل اخو نوره ليا جات العزاوي=الامام اللي ينومس في مقامه

حرٍ اشقر ريش للعليا شفاوي=يوم شالوا برقعه شفت القرامه

شفت فعله ماروالي كل راوي=مشهدٍ يكرم عن افلام الندامه

شدني لمشاهده وانا هواوي=وقمت اتابع معركة عنف وصرامه

معركه بين الحبارى والنداوي=هو يبا الصيده وهي تبي السلامه

يوم جاها من علو الجو هاوي=كوبرت له ثم لمسها حسامه

ناشها رمحٍ مثل رمح العطاوي=او سهم مزيد ليا ذب العمامه

وارتفع ثم جالها بالشر ناوي=وهي تدرّق من ثمامه في ثمامه

صايده وقت اللقا ماهوب ياوي=صاعها به ثم جعل فيها علامه

وضيعت من ضربته كل الهقاوي=وسلّمت له طائعه وادرك مرامه

كافحت لكن جاها امرٍ سماوي=مضرمٍ في قلبها نشّب سهامه

وحايلوه اهل المدايح والسناوي=ولاخذوها لين حطو له حمامه
doPoem(“font=’Arial,5,#000000,bold,normal’ bkcolor=’#D3EDEE’ bkimage=” border=’inset,4,#400000′ shadow=’1′ type=0 line=0 align=center use=ex num=’0,#400000′”);ضاوي العصيمي