ياللي جديدي تنشد عنه ويهمك
اقول يوم ان كل عد ماواجه
لاتزبن اللاش لونه ولد عمك
ماهوب مشفيك وقت الضيق والحاجه
دور كريم ليا جيته نقل همك
ضحكة محياه طب القلب وعلاجه
ان جيت رحب ولن قفيت ماذمك
واضح ولاتخلف الايام منهاجه
واليا نخيته تعزوا واتجه يمك
وشفت السعد مثل برق الغيث بحجاجه
تطرد فعوله هموم فورت دمك
وتجلى غطاليس ليلك شمعة سراجه
والا الضعيف ليامنه هرج سمك
دايم علومه عن الذربات منعاجه
هرجة لسانه تزود همك وغمك
ابعد عنه يالسنافي تسلم ازعاجه
لونه اخوك من ابوك ومن امك
باب يوديك يمه صك مزلاجه
ضاوي العصيمي