يوم25

بعد الانتهاء من البنيان واول شهر من سكن شاعرنا لمنزله وفي يوم الرواتب 25 كان مولد هذه القصيدة وقال شاعرنا انها على لسان كل من مر بهذه المعاناه ولاتعنيه وحده الناس تفرح يوم خمسه وعشرين=وانا ماحصل منه غير العقايب

تلقى على بابي حدود الثلاثين=من الصباح الهم صياح وطلايب

كلٍ يقول تسدد الدين هالحين=وان قلت مقدر ولعوها شبايب

واوزع الراتب على الف .. والفين=ومصروف ورعاني يروّح نهايب

ومن بعدها الجيران مني حريصين=الكل منهم صار حذرٍ وهايب

من خوف لاطلب منه سلفة نهارين=وتتعب على دربي سباق الركايب

ويبدأ الشهر واضاعف الدين ضعفين=ماهوب حبٍ فيه لكن غصايب

حنا خلقنا الله وبرقابنا دين=ولايتركه يكود صاغر وعايب

للضيف والجيران والمستحقين=واصحابنا وانسابنا والقرايب

ولانعتبر حيين لوكان حيين=ان كان مانقضيه والبال طايب

اجدادنا ماورثونا ملايين=ميراثنا منهم ثقال النوايب

نقوم بالواجب وحنا نشيطين=اليا ارتخى عن واجبه كل خايب

ونطلب عظيم الشان في الضيق ويعين=ياتي الفرج من عند ربي وهايب

هذي عوايدنا القديمه وبعدين=شربتها فنجال من عند شايب

ولو ذقت في دنياي امر الامرين=ماني وانا ضاوي قرّيب حضايب

والله ماجنب عن دروب الميامين=حتى على قبري ترز النصايب

ورزقي على رب الفقارى المساكين=منّزل الماء من ثقال السحايبdoPoem(“font=’Simplified Arabic,6,#000000,normal,normal’ bkcolor=’#DFEFF1′ bkimage=” border=’groove,9,#1222DE’ shadow=’1′ type=0 line=0 align=center use=ex num=’0,#400000′”);